A nena que levitou
Pasou no Festival de la Luz, en Boimorto. O que vos imos contar quizais tivo que ver co momento en que empezou o concerto, pois foi á hora meiga.
Chuches Amil arrancou con Un conto ao revés, e a asistencia ao concerto botou a bailar. Na metade da canción comezamos a escoitar murmurios e, axiña, exclamacións de abraio. A xente arremuiñouse arredor dun fato de raparigas. Abrínme paso para ver que pasaba, e eu mesmo vinme sorprendido ceibando un berro de abraio da miña gorxa: unha nena bailaba levitando. O que ledes, miñas e meus. Os pés da moza non tocaban o chan mentres bailaba, e segundo avanzaba a canción, a rapariga levitaba máis alto.
Un matrimonio mozo, que se identificou como os proxenitores da nena, achegáronse a ela, e espetaron un pau no chan. Despois, con pachorra, ataron o extremo dunha corda ao nocello da nena, e aseguraron o outro extremo no pau.
Deste sorprendente xeito, a nena puido bailar todo o concerto sen medo a perderse entre as nubes.
Lembrade, estas cousas só pasan nos concertos de Chuches Amil.