Relatos

Composición: Carlos Amil Composición: Carlos Amil

Os monstros xa non queren asustar

Hai ocasións nas que estamos ben empanados. Sabedes cando din aquilo de que hai que estar ao que hai que estar? Nós caso non fixemos, e pasou o que pasou. E pasou en terra meiga. Por unha vez, excusade que non concrete a praza, pero os nosos anfitrións non son de recibir xente, senón de asustala.

Convidaronos a actuar na asociación Mete Medo, composta por monstros profesionais, co galo de celebrar o Samaín. O concerto foi un éxito de medo, con tódolos monstros de festa rachada, bailando sen parar e algúns mesmo sen pés. Un dos mellores concertos fantasma de Chuches Amil.

Gardamos para o bis final a canción Os monstros xa non queren asustar. E aí enleouse o conto. Un monstro pequerrecho, melenudo, deixou de bailar cun berro de noxo. Subíu ao escenario alporizado, ceibou un croque en Fran, arrebatoulle o micro, e largou un mitin que nos deixou a todos, especialmente aos de Chuches Amil, tremando.

O monstro estivo ouveando e rifando máis de media hora, laiándose de que unha asociación de asustadores profesionais contratasen a uns aprendices de musiquiños que ousaban cantar que os monstruos xa non queren asustar. E ensarillou sentencias como: un monstro que non asusta non é un monstro, é un feirante; un afeccionado na procura dun contrato televisivo; un ser vulgar disfrazado de metemedo para chamar a atención; e así un fato de piropos que metían medo.

Segundo ía alporizándose, o monstro pequerrecho medraba e medraba e botaba lume polos ollos e lixo pola boca.

Non sabemos como rematou o conto, porque nun descoido dos presentes fuximos a fume de carozo. Aló quedaron batería e guitarras, pero calquera vai buscalas! Entendédeme ben, non é que teña medo, pero cada vez que penso niso teño que cambiar de roupa interior.

Utilizamos cookies propias y de terceros para mejorar nuestros servicios y mostrarle publicidad relacionada con sus preferencias mediante el análisis de sus hábitos de navegación. Si continua navegando, consideramos que acepta su uso. Puede cambiar la configuración u obtener más información en nuestro aviso legal.



Acepto