Crónica de Chuches Amil no CEIP Unión Mugardesa
Este fin de curso vivimos unha das experiencias máis gratificantes da nosa xa longa traxectoria de concertos. Moito lle temos que agradecer á Anpa Catro Camiños do CEIP Unión Mugardesa por convidarnos a celebrar o fin de curso no seu colexio.
Previamente, e durante tres semanas, a cativada estivo traballando con tres temas do noso festeiro repertorio: “Os monstros xa non queren asustar”, e dous dos grandes éxitos de Chuches Amil: “Os porcos das fragas do Eume” e “O porvir é meu”.
A actuación dividiuse en dúas quendas: a primeira para infantil, e a segunda para primaria.
A participación d@s perto de sesenta cativ@s de tres a seis anos foi contínua e fabulosa: palmas, coros, e pés e troncos en permanente movemento a pesares de estar sentados no chan do pavillón. Foi escacharrante ver reptar os corpos na danza de chan á que foron sometidos polas cancións e o seu imparable ritmo.
A éxtase acadouse na quenda de primaria, entre @s oitenta rapaces e rapazas que non deixaron de bailar, saltar e correr durante todo o concerto. Os coros cheos de ledicia ceibados perante a interpretación de “Os porcos das fragas do Eume” estouparon nun canto de liberación e optimismo en “O porvir é meu”.
A rapazada toda cantou a pleno pulmón o retrouso “Medrarei e moi poderosa serei, e vou ser todo o que eu queira ser”, ata o punto de que Fran deixou de cantar mais o retrouso seguíu atronando e facendo que o pavillón tremase de emoción pola confianza da nosa rapazada no porvir.
A emoción contaxiouseme, e subíu dende a pranta dos meus pés ata a miña cocorota, e sentín de súpeto que levitaba diante do público máis receptivo que atopamos ata hoxe. Grazas, mestr@s e educador@s, por facer que a música pop galega se converta nunha referencia para a nosa rapazada. O porvir é meu, teu e seu.