Chuches Amil estrea mundialmente “O Apalpador”!!!
De noite, silandeiramente, case ás agachadas, como o propio personaxe, a canción “O Apalpador” chega á nosa páxina.
Pero aquí estamos nós para facer as cousas ben, e darlle o bombo que se merece unha nova tan espectacular.
“O Apalpador” é a primeira canción que ve a luz da xeira de temas que estivemos a gravar a finais do mes de setembro e primeiros de outubro no estudio de gravación Drum&Roll Studios. Unha canción axeitada ao tempo de nadal que está por vir.
Fran Amil na batería e cantando, Antón Torroncho no baixo, Paco Cerdeira “Pakolas” na guitarra eléctrica, Richi Casás no saxo e no acordeón, e Ángeles Dorrio e Carmen Rey nos coros forman unha banda imbatible. A produción correu a conta de Fran e de Carlos Amil, e este último foi o produtor musical. Iago Blanco exerceu de técnico de son e de mesturas.
Podedes descargar O Apalpador e levalo no móbil ou na tablet, e mesmo gardalo no disco duro para oilo cando e onde queirades.
Ou podedes atrapar o QR e escoitalo no Spotify.
Chuches Amil, música con vida. Chuches Amil, música infinita.
