Letras e Acordes. Con ou sen consentimento
A segunda entrega de “Letras e Acordes” acolle unha das grandes cancións abeiradas no magnífico disco-libro “Monstros. Con ou sen consentimento”. Trátase dese aclamado himno xeracional titulado “Con ou sen consentimento”, que publica a viva voz a nosa vontade de vivir ao noso xeito, sen imposicións alleas.
O disco-libro, editado pola Editorial Galaxia na súa colección “Sonárbore” foi un dos grandes éxitos de Chuches Amil, un disco cheo de alfaias musicais que irán alimentando esta sección que vos permitirá gozar das nosas cancións nas vosas celebracións.
Se vos apetece escoitar a canción orixinal, só tedes que clicar para vos dirixir á sección Cancións, e unha vez dentro da sección, deslizar cara abaixo a barra deslizadora ata chegar á canción “Con ou sen consentimento”, que nesta altura é a última canción da lista, porque ese posto ocupa no disco-libro. Que xa estades aí? Fácil, darlle ao play no reprodutor e sen máis demora xa podedes escoitar o noso éxito. Vaites, xa chegan ata min as notas ledas e funkys. Grazas por darlle ao play.
Adxuntamos un arquivo no que podemos ver a letra da canción “Con ou sen consentimento”, cos seus acordes para poder tocala coa guitarra, ao que podedes acceder se premedes no botón “Descarga” situado no remate do artigo.
Presentamos tamén un videoclip onde podedes facer o karaoke de Con ou sen consentimento co noso infatigable Fran guiándonos na imaxe.
Cumplimos deste xeito a promesa de fornecer unha fabulosa canción a man para as vosas festas. Un agasallo singular da man da vosa banda favorita!!!
A que esperades? Papás e mamás, mestres e mestras, descargade o arquivo coa letra e os acordes, e botádelle un ollo ao videoclip co karaoke.
Chuches Amil, música infinita. Chuches Amil, música con vida.